一（不等於最憎呀下）

呢個主題係我睇楊學德《十大最憎》激發我的，我認，由細到大我都係好麻煩又奄尖腥悶，好多時都睇唔過眼，我有理由相信我憎既野夠我出本書！

一（不等於最憎）

今時今日大家搵食都會上同一個網，我唔知係咪好多人都想上位定點，總之個食評就懶係非主流。尤其有啲人會將成件事既人物關係先說明一次，例如去左美國讀書既表妹返黎放暑假啦，仲有岩岩結婚既表弟又話約出黎聚舊盛盛，咁我地就諗住去食乜乜乜，點知又訂唔到枱，所以就搵左呢間啦啦啦啦啦。大佬呀，我剩係想知啲野好唔好食幾錢位咋。又有啲開場白係「自從何首烏上次食過ｘｘ樓覺得好難食，今次一於約埋鬆弛熊試新野」，我心諗邊撚柋個何首烏呀？鬆弛熊唔係日本人黎咩？我接受唔到啲人用自己個名稱呼自己，真係接受唔到！！

仲有呀仲有呀，點解啲相out曬fo都好意思放出黎架，有啲仲加埋曬啲死人核突框框，係咪打得少呀？另外今日見到有人全部相片都是打橫，但個菜的打直影架喎！想點呢？

食評好難寫呢層我都知（所以我甚少寫），但我只係想睇集中在食物、環境及服務上既食評，是過份的要求嗎？

近日發現新拉麵店一風堂的食評真係好正，除左大量九唔搭八的形容詞仲講到日本係自己家鄉咁，笑死我了！