初試空中瑜伽

先旨聲明呢篇文係無圖，同埋為咗更真確表達我嘅感受所以用廣東話寫。（順便話下啲港女「Ｘ你去做運動就做運動啦，影相做乜啫？」）

大大話話做瑜伽都做咗十年，由當年Bikram Yoga做到佢摺埋後轉會去Pure Yoga，雖然依家懶咗但都keep住一星期做兩至三堂。近年一講做瑜伽啲人就問「咁有冇做空中瑜珈？」，似乎空中瑜伽真係好吸引到未試過瑜珈嘅人。

咁啱最近覺得Pure差咗，越來越多人遲到但導師照俾佢入，仲有唔止一次見到有人拎埋電話去上堂但導師無理，嗰位學員正正喺導師隔離我唔信佢睇唔到。如果你真係秒秒鐘幾廿萬上落唔該你返出去，我唔想搞大佢。

同事就話Dickson Yoga好，Pure啲導師都係嗰邊train出嚟咁話，加上又真係想試下空中瑜珈，仲一心諗住如果嗰邊OK就轉會添.。

去到試堂，中心係新嘅，但裝修品味就堅係差，入埋更衣室更加覺得品味同用料都係中國質素，職員話因為新開咗幾日所以好多野未齊。即是咁，如果你未準備好就開，都證明管理上有啲問題。

至於空中瑜伽堂，有啲老屎忽可能玩咗好多次啦，對於新同學要節調布帶搞咗好耐唔太耐煩。不過大部分都做得差過我喎，做得差無緊要，最討厭係扮勁，就算我知道導師想做乜，我都會聽到指示先做，而唔會懶快咁表演俾人睇，因為正確地進入式子先係最最緊要！

空中瑜伽完全係gimmick行先，大部分式子都可以喺地面做到，如果經驗不足做空中瑜伽分分鐘會拉傷，只係利用地心吸力令你好似易做咗，又唔駛練core就可以倒立，係吸引嘅。但要提升柔軟度我建議要遁序漸進，空中瑜伽反而會令人為咗想完成動作而夾硬上。

至於當日最難應該係以下呢個動作；（又話無圖？）

導師其實認真教的，而且都有花時間幫每一個學員。不過全程都係講中文，Pure啲導師個個都操流利英文架喎（係有１個英文好差，所以我唔上佢啲堂），真係佢地Train出嚟？作為一個扮野港女，我鍾意英文上堂多啲，起碼你之後都google到自己做咗乜。

落堂時聽到有位阿太同導師講「仲以為今日會做啲難啲嘅動作添！」，導師就解釋話今日新人多。呢位阿太，其實你做得幾叻都無用，瑜伽唔係比賽，你鍾意高人一等懶勁已經無yogi spirit啦！

講到咁，好明顯最後我都無join佢啲plan，衰啲講句，唔係關瑜珈堂時，係啲會員質素唔得。一入去到有一位學員搞唔掂個locker，搵職員嚟搞咗一輪，原來阻住咗一位阿太拎野（又係佢呀！），阿太就話「俾我拎咗野先啦，我要上堂啦，等咗你地好耐！」。Pure整體會員係比較有教養，不過唔同centre啲人有少少唔同嘅，MK就真係好MK，每次浴室有M巾、啲人將毛巾放喺地抺腳、無禮貌都係MK多。尖沙咀同鰂魚涌相對好好多，出出入入都要講唔該同埋比較少企係locker前搞勁耐阻住其他人，唯一唔好係沖涼位置較少不時要排隊。唉，似乎我都係要繼續留喺Pure，希望佢唔好再靜雞雞加我價啦～


補充：試堂價$200，如果立即加入可豁免

後續：有關空中瑜伽
  

(2016年9月19日)我發現這篇的點擊率超級高，所以補充一下。

成個過程最令我不安係倒轉咗個人之後係分唔清方向，跟住如果跣手或者跣腳係好難調整返除非你出返個式子再嚟過，我就有一下條帶跣低左覺得好唔舒服但因為成個人重量都壓住條帶又搞唔到，要等到導師嚟先發現，所以大家如果試玩發現有咩唔妥記得出聲！